ഓസ്ട്രേലിയയും കിവീസും തമ്മിൽ കിടിലൻ ടി20 ത്രില്ലർ; അവസാന പന്തിൽ ഫോറടിച്ച് വിജയശിൽപിയായി ടിം ഡേവിഡ്
വെല്ലിങ്ടണിൽ ന്യൂസിലൻഡും ഓസ്ട്രേലിയയും (New Zealand vs Australia) തമ്മിൽ നടന്നത് ഗംഭീര ടി20 ത്രില്ലർ. 400ലധികം റൺസ് പിറന്ന മത്സരത്തിൽ ഓസ്ട്രേലിയ 6 വിക്കറ്റിനാണ് വിജയം സ്വന്തമാക്കിയത്.
വെല്ലിങ്ടണിൽ നടന്ന ഒന്നാം ടി20യിൽ ന്യൂസിലൻഡിനെ 6 വിക്കറ്റിന് തകർത്ത് ഓസ്ട്രേലിയ (New Zealand vs Australia). ഇരുടീമുകളും കൂറ്റൻ സ്കോർ സ്വന്തമാക്കിയ മത്സരത്തിൽ അവസാന പന്തിലാണ് ഫലം നിർണയിച്ചത്. ആദ്യം ബാറ്റ് ചെയ്ത കിവീസ് 20 ഓവറിൽ 3 വിക്കറ്റ് നഷ്ടത്തിൽ 215 റൺസാണ് നേടിയത്. 4 വിക്കറ്റ് നഷ്ടത്തിൽ ഓസ്ട്രേലിയ ഈ ലക്ഷ്യം മറികടക്കുകയായിരുന്നു.
മിച്ചൽ സാൻറ്നറിൻെറ നേതൃത്വത്തിൽ ഇറങ്ങിയ കിവീസിന് വേണ്ടി ഓപ്പണർ ഡെവോൺ കോൺവെയും യുവതാരം രചിൻ രവീന്ദ്രയും അർധശതകങ്ങൾ നേടി. രചിൻ 35 പന്തിൽ നിന്ന് 68 റൺസും കോൺവെ 46 പന്തിൽ നിന്ന് 63 റൺസുമാണ് നേടിയത്.
മറുപടി ബാറ്റിങ്ങിൽ തുടക്കം മുതലേ ഓസീസ് വെടിക്കെട്ട് പ്രകടനമാണ് നടത്തിയത്. 15 പന്തിൽ നിന്ന് 24 റൺസുമായി ട്രാവിസ് ഹെഡും 20 പന്തിൽ 32 റൺസുമായി ഡേവിഡ് വാർണറും കിടിലൻ തുടക്കമാണ് ടീമിന് നൽകിയത്. ക്യാപ്റ്റൻ മിച്ചൽ മാർഷാണ് ടീമിൻെറ ടോപ് സ്കോറർ. 44 പന്തിൽ നിന്ന് 7 ഫോറുകളും 2 സിക്സറും അടക്കം 72 റൺസാണ് താരം നേടിയത്.
