ഏറ്റവും സുരക്ഷിത വിമാനയാത്ര ആരുടേത്? 25 എയര്ലൈനുകളുടെ പട്ടിക പുറത്തുവിട്ടു
എയര്ലൈന് റേറ്റിങ്സ് എന്ന എയര്ലൈന് സുരക്ഷ, ഉല്പന്ന റേറ്റിങ് അവലോകന വെബ്സൈറ്റാണ് പട്ടിക തയ്യാറാക്കിയത്. ഏറ്റവും സുരക്ഷിത എയര്ലൈന് ന്യൂസിലന്ഡിന്റെ വിമാന കമ്പനിയായ എയര് ന്യൂസിലാന്ഡാണ്. ഗള്ഫ് രാജ്യങ്ങളിലെ മൂന്ന് വിമാന കമ്പനികളും പട്ടികയില് ഇടംനേടി. യുഎഇയുടെ ഇത്തിഹാദും എമിറേറ്റ്സും നാല്, ആറ് സ്ഥാനങ്ങളില് എത്തിയപ്പോള് ഖത്തര് എയര്വേസ് അഞ്ചാം സ്ഥാനം കരസ്ഥമാക്കി.
ദോഹ: 2024ലെ ഏറ്റവും സുരക്ഷിതമായ 25 എയര്ലൈനുകളുടെ പേരുകള് പട്ടികപ്പെടുത്തി. എയര്ലൈന് സുരക്ഷ, ഉല്പന്ന റേറ്റിങ് അവലോകന വെബ്സൈറ്റായ എയര്ലൈന് റേറ്റിങ്സ് ആണ് പട്ടിക തയ്യാറാക്കിയത്. എയര് ന്യൂസിലാന്ഡാണ് ലോകത്തിലെ ഏറ്റവും സുരക്ഷിതമായ വിമാനയാത്ര നല്കുന്നതെന്ന് റിപ്പോര്ട്ടില് പറയുന്നു.
പ്രവാസി മലയാളികള് ഏറ്റവും കൂടുതല് ആശ്രയിക്കുന്ന ഗള്ഫ് രാജ്യങ്ങളിലെ വിമാന കമ്പനികളും ലോകത്തെ 25 സുരക്ഷിത എയര്ലൈനുകളില് ഉള്പ്പെട്ടിട്ടുണ്ട്. യുണൈറ്റഡ് അറബ് എമിറേറ്റ്സില് നിന്നുള്ള ഇത്തിഹാദ് എയര്വേസും ഖത്തറിന്റെ ദേശീയ വിമാന കമ്പനിയായ ഖത്തര് എയര്വേസും യഥാക്രമം നാലും അഞ്ചും സ്ഥാനങ്ങള് കരസ്ഥമാക്കി. യുഎഇയുടെ എമിറേറ്റ്സ് എയര്ലൈന്സിന് ആറാം സ്ഥാനം ലഭിച്ചു.
ഇത്തിഹാദ് എയര്വേസും എമിറേറ്റ്സ് എയര്ലൈന്സും യുഎഇയുടെ ഫ്ളാഗ് കാരിയറുകളായി പ്രവര്ത്തിക്കുന്നു. ഇത്തിഹാദ് എയര്വേയ്സിന്റെ ആസ്ഥാനം അബുദാബിയാണെങ്കില് എമിറേറ്റ്സ് ദുബായ് ആസ്ഥാനമാക്കിയാണ് ആഭ്യന്തര-അന്തര്ദേശീയ സര്വീസുകള് ഏകോപിപ്പിക്കുന്നത്. രാജ്യത്തെ ഏറ്റവും വലിയ രണ്ട് എയര്ലൈനുകളാണ് ഇവ രണ്ടും.