കളിയിക്കാവിളയിൽ നിന്ന് കരുനാഗപ്പള്ളിയിലേക്ക് ഇനി കെഎസ്ആർടിസി; ബസിൻ്റെ റൂട്ടും വിവരങ്ങളും ഇങ്ങനെ
തമിഴ്നാട്ടിലെ കളിയിക്കാവിളയിൽ നിന്ന് കരുനാഗപ്പള്ളിയിലേക്ക് തീരദേശ സർവീസുമായി കെഎസ്ആർടിസി. ഈ പതിനഞ്ചിന് വൈകിട്ട് ഗതാഗത മന്ത്രി ആൻ്റണി രാജു സർവീസ് ഫ്ലാഗ് ഓഫ് ചെയ്യും. ഫാസ്റ്റ് പാസഞ്ചർ ബസുകളാണ് സർവീസ് നടത്തുക
തിരുവനന്തപുരം: തമിഴ്നാട്ടിലെ കളിയിക്കാവിളയിൽ നിന്നും കരുനാഗപ്പള്ളിയിലേയ്ക്ക് തീരദേശ കെഎസ്ആർടിസി ബസ് സർവീസ്. ഈ മാസം പതിനഞ്ച് മുതൽ സർവീസ് ആരംഭിക്കും. ഫാസ്റ്റ് പാസഞ്ചർ ബസുകളാണ് സർവീസ് നടത്തുക. ആദ്യ സർവീസ് പതിനഞ്ചാം തീയതി ബുധനാഴ്ച വൈകുന്നേരം അഞ്ച് മണിക്ക് വെട്ടുകാട് വച്ച് ഗതാഗത മന്ത്രി ആന്റണി രാജു ഫ്ലാഗ് ഓഫ് ചെയ്യും.
കളിയിക്കാവിളയിൽ നിന്നും കരുനാഗപ്പള്ളിയിലേയ്കും തിരിച്ചുമായി നാല് സർവിസുകളാകും ഉണ്ടാകുക. കളിയിക്കാവിളയിൽ നിന്ന് പാറശ്ശാല, പൂവാർ, വിഴിഞ്ഞം, പൂന്തുറ, ബീമാപള്ളി, വലിയതുറ, ശംഖുമുഖം, കണ്ണാന്തുറ, വെട്ടുകാട്, വേളി, സെന്റ് ആൻഡ്രൂസ്, പെരുമാതുറ, അഞ്ചുതെങ്ങ്, വർക്കല, കാപ്പിൽ, പരവൂർ, ഇരവിപുരം, കൊല്ലം, നീണ്ടകര, ചവറ വഴി കരുനാഗപ്പള്ളിവരെയും തിരിച്ചും രണ്ട് ഫാസ്റ്റ് പാസഞ്ചർ ബസ്സുകളാണ് സർവ്വീസ് നടത്തുന്നത്.
കളിയിക്കാവിളയിൽ നിന്നും കരുനാഗപ്പള്ളിയിൽ നിന്നും രാവിലെ 4.30ന് ആദ്യ സർവീസ് ആരംഭിച്ച് രാത്രി 11.25ന് അവസാനിക്കുന്ന വിധത്തിൽ രണ്ട് ബസുകൾ നാല് സർവീസുകൾ വീതം നടത്തും. തിരുവനന്തപുരം, കൊല്ലം ജില്ലകളിലെ തീരദേശവാസികളുടെ യാത്രാ ക്ലേശം പരിഹരിക്കുന്നതിനും വിനോദ സഞ്ചാരത്തിനും പുതിയ ബസ് സർവീസ് സഹായകരമാവുമെന്ന് മന്ത്രി ആൻ്റണി രാജു പറഞ്ഞു.
![logo side](https://www.pramukhan.com/wp-content/uploads/2023/03/logo-side.jpg)